สู่ขวัญแต่งงาน (ทำนองร่าย)
                                                                             แต่ง/เรียบเรียง โดย   หนูพันธ์ จันทะปะทัด

          ศรี ศรี มื้อนี้เป็นมื้อสันวันดี มื้อเศรษฐีอมุตตโชค โตกใบนี้แมนโตกไม้จันทน์ ขันใบนี้แมนขันวิเศษ ผู้เหนือเกศป่อนลงมา เทวดาเอามาสู่ เอามาอยู่ในเคหา สองสามีภรรยาจักได้เกิด พระอินทร์เปิดส่องพระแจพระพรหมแลเผยพระโอษฐ์ ว่ามื้อนี้บ่อมีโทษทั้งมวล บรบวนทุกสิ่งอย่าง ผู้เป็นช่างแต่งพาขวัญ
มีทั้งมวลหมากเหมี่ยง พาขวัญเที่ยงใบศรี สวยงามดีหลายชั้น แถนพ่อปั้นแต่งมานำ มีเงินคำพันไถ่ เอามาใส่พาขวัญ บอระบวนถ้วนถี่ งามเอานีจังเมืองแมน ฝ้ายผูกแขนห้อยระย้า มาจากฟ้าเมืองพรหม มาเชยชมสองอ่อน เข้านอนบ่อนหมูนหมอน สองเนานอนแขนก่าย ทั้งสองฝ่ายตกลง สองอนงค์ลูกของแม่
มาแหนแห่เฮือนหอ โคตรวงศ์ยอขันโตก ถือโฉลกเหลือตรา ยกลงมาตั้งใส่ ขันโตกใหญ่ทองคำเพชรมานำพลอยต่อ นิลมาก่อประดับนำ เงินและคำเต็มถาด หลาย…บาทเป็นสินดอง เอามาฮองตกแต่งบ่ได้แบ่งปันไผ สองหัวใจมาอยู่ฮวม มาอยู่ร่วมหอห้องแต่งดอง คนทั้งสองสมเผ่า เป็นคู่เก่านำมา สองขวัญตามาพบพ้อ
จังให้พ่อมาขอ จึงให้ยอขันหมาก ไขคำปากว่าตกลง สมประสงค์ทั้งสองฝ่าย เอาขาก่ายเมียแพง …ผู้เป็นผัวกะอย่าแข็งคำเว้าเห็นพ่อเฒ่าแม่เฒ่า ให้เคารพยำเกรง อย่าโสงเสงเสียงปาก อย่าเว้าถากคำจา มีสัมมาคารวะ ต่อพ่อแม่ ทั้เฒ่าแก่และวงศาคันไปไฮ่กะให้ฮู้จักมาคันไปนากะให้ฮู้จักต่าว อย่าทำตัวเป็นบ่าวเสเพลร่ำรวย อย่าตื่นสวยลุกยาก อย่าได้ปากเกินตัว ผู้เป็นผัวให้ฮักเมียจนแก่ ให้คือแม่ของโต อย่าพาโลเลาะบ้าน อย่าขี่คร้านนอนเว็น อย่าไปเห็นสาวแก่ ให้ไปแวโคตรวงศ์อย่าขี้โกงต่อโคตร อย่าเว้าโพดคันได้เห็น เฮ็ดบ่เป็นให้ถามไถ่ อย่าไปใหญ่กว่าลุง อย่าไปสูงกว่าป้า อย่าไปด่าวงศ์วาน อย่าไปพาลพี่น้อง อย่าไปฟ้องซุมแซง….ผู้เป็นเมียกะอย่าแข็งปากเว้า ตื่นแต่เช้าลุกก่อนผัวโต อย่าเสียงโวคุยเสียด อย่าไปเคียดไววา สิไปมากะให้บอก อย่ากลับกลอกให้ปากเว้าจาขานยามเลิกงานให้รีบกลับบ้าน อย่าจุ้นจ้านเที่ยวต่อทางใด๋ คันไปไฮ่กะให้รีบมา คันไปนากะให้รีบต่าวเห็นผู้บ่าวอย่าตาส้มตาหวาน อย่าอาจหาญจองหองใส่ปู่ย่า อย่าไปด่าอาวอา ยามไปมาให้คมเคี่ยม อย่าให้เสื่อมซุมแซงอย่าไปแฮงฟืดฟาด อย่าประมาทปู่ย่าโต อย่าไปโสความเก่า อย่าไปเล่าความเดิม อย่าไปเสริมผู้อื่น อย่าไปตื่นเสียงคนอย่าไปวนของเพิ่น คันเพิ่นเอิ้นจังขาน คันเพินวานจังซอย ให้ไปค่อยมาค่อยเห็นแก่โคตรวงศ์ อย่าขี่โกงเถียงพ่อแม่ เห็นคนแก่ให้ปากเว้าจาไขอย่าจัญไรป้อยผีป้อยฮา อย่าไปด่าพี่น้องทางผัว อย่าเมามัวสุราเบี้ยโบก อย่าโซกโลกเล่นซู้กับผัว อย่าหลงตัวหลงกลชายชู้ ไปมีหมู่มีเพื่อนมีฝูงอย่าหัวสูงไปหมอบมาหมอบ อย่าด่าปอบผีฮาผีภู อย่าซูลูเอาของบ่บอก อย่ากลับกลอกปู่ย่าวงศา ยามไปมาให้พักให้แวฮักคือพ่อคือแม่ของโต อย่าพาโลตอแหลหลอนหลอก อย่าไปบอกเอาสิ่งเอาของ ผิดทำนองคลองลูกสะใภ้ กว่าสิได้ลูกเพินมาแงงอย่าเว้าแข็งคำหวานโอนอ่อน …ว่ามาถ่อนมาเยอขวัญเอย….ขวัญสองเจ้าให้มาอยู่นำกัน อย่าไปปนคนธรรพ์ในป่า อย่าไปท่าน้ำหลากไหลแฮง อย่าไปแงงผาซันพันยอด มากายกอดเป็นมิงสายแนน เอาสองแขนจับกันไว้แหน่นขวัญเจ้าแล่นไปไกล ขวัญเจ้าไปในป่า หนีลงท่าไปทางเฮือ ไปเมืองเหนือและเมืองลุ่ม ไปอยู่พุมเฟือยหนาม ไปนาทามหรือนาฮอง ไปหลงป่องทางมา ไปตามหาสาวบ่าว ขวัญบ่ต่าวคืนมา อยู่ภูผาขึ้นงาไม้ อยู่ภาคใต้เหนือกลางอีสาน เฮ็ดโรงงานหรือว่าก่อสร้าง เป็นนายช่างเขียนแบบหรือคุมงานเป็นข้าราชการครูทหารตำรวจ ไปเที่ยวตรวจอยู่ถิ่นทางใด๋ให้มาสามื้อนี้วันนี้ ว่ามาเยอขวัญเอย….(เนื้อหากล่าวถึง หน้าที่ การงานของเจ้าบ่าว เจ้าสาว และที่ที่ทั้งสองทำงานอยู่)
          (สรภัญญ)์ ขวัญเอยให้รีบมา สู่กายาลูกทั้งสอง พวกเธอสมใจปอง เงินและทองหลั่งไหลมา วันนี้วันมงคล มีสุขล้นกันเถิดหนา สมรักสิเน่หา ชั่วดินฟ้าอย่าแคล้วกัน ๆ..........
     ว่ามาเยอขวัญเอย…ขวัญไปลี้อยู่ที่ทำงานสุขสำราญซื้อของอยูในห้าง ไปเที่ยวค้างล่องแพเมืองกาญจณ์ไปทำงานอยู่ต่างประเทศ อยู่คูเวตสิงคโปรเกาหลี ซาอุดิใต้หวันญี่ปุ่นขวัญอยู่พุ้นให้เจ้ารีบมาขวัญเจ้าไปศึกษาอยู่ต่างถิ่น หากินอยู่เมืองหลวง เดินควงสาวอยูในห้าง ไปรับจ้างอยู่เมืองกรุง ให้มาสามื้อนี้วันนี้ ว่ามาเยอขวัญเอย …ขวัญแข้งเจ้าสาวให้เจ้ายางลีลา ๆ ขวัญขาให้เจ้ามาลีล้ายมานอนอยู่นำอ้าย ชายผู้เป็นผัว มากินนัวจ้ำป่น อย่าได้บ่นทำงาน
ผัวพาหาเงินล้าน มาอยู่บ้านดอมกัน ว่ามาเยอขวัญเอย…
      (ลำ) ขวัญสองเจ้าเร็วพลันมาด่วน ชวนกันมาฮ่วมห้อง นอนซ้อนก่ายหมอนมาอยู่ซ้อนนอนห่มลมหนาว มานอนชมเดือนดาว เบิ่งสวรรค์อยู่ในมุ้ง.....            ว่ามาเยอขวัญเอย…ผู้เป็นเมียให้นอนต่ำ ผัวให้ล่ำนอนสูงเตียงไม้ยูงพ่อแต่งไว้ แม่แต่งให้ลูกทั้งสอง หมอนมาฮองเฮียงกันเป็นคู่ เพิ่นให้อยู่นำกันอย่าหนี นานหลายปีจนว่าแก่เฒ่า มีลูกเต้าสืบหน่อแทนแนว เป็นเชื้อแถวต่อไปภายหน้า ว่ามาเยอขวัญเอย…มาอยู่เฮือนหลังใหญ่ เพินปลูกใส่เป็นเรือนหอ เพินปลูกรอสองอ่อน ปลูกไว่ก่อนคอยบุตรา พากันมาอย่าได้ช้า มาอยู่ฮ่มเฮือนงาม มาอยู่ผามหลังใหม่ ปูผูกใหญ่ทั้งหมอนลาย ของกินหลายเหลือหลาก บ่อึดอยากแนวใด๋ มาไวไวหาพ่อแม่ พวกเฒ่าแก่ทั้งอาวอา ญาติวงศามาคอยอยู่มาฮอดปู่มาคอยหลาน
อย่าอยู่นานมันสิช้า ให้มาอยู่ดอมกัน จวงจันทน์หอมตกแต่ง กาบบัวแบ่งอยู่สอนลอน น่าออนซอนเตียงตั่งมีบ่อนนั่งเซามีแฮง คอยจอมแพงสองหน่อ ปานแถนหล่อไว้คอยรอ มาเฮือนหออย่าได้ช้า เพินแต่งถ่าอย่าไปใส มาไวไวมันสิค่ำ ตะเว็นต่ำมืดมัวเมา มาอยู่เซานำแม่พ่อ มาสร้างก่อแปลงสาน อยู่เฮือนซานอย่าห่าง อยู่ตะลางเฮือนโต ว่ามาเยอขวัญเอย….มาเชยชมในห้อง เฮือนหอเพินตกแต่ง สองจอมแพงให้ต่าวโค้งมาถ่อนอย่าอยู่นาน…..น่า ขอให้ สำราญด้วยพระคาบทว่า อเนกเตโช ไชยตุภวังชัยมังคลัง สุขัง พลัง อาวาหวิวาโห สุมังคโล สุขิโต โหตุ สาธุ ไชโย ๆ ๆ